Sjúrður og Anna fingu 55,4 prosent av atkvøðunum á fólkatingsvalinum

Fínteljingin av fólkatingsvalinum var liðug leygardagin. Og sjálvt um onkrar atkvøður fluttu millum valevnini, fekk fínteljingin onga ávirkan á úrslitið.

Tað var nú heldur ikki væntað, tí tey bæði fremstu - og valdu - fingu fleiri atkvøður enn øll hini 50 valevnini tilsamans.

Sjúrður Skaale fekk sum fyrstvaldur 10.823 atkvøður, og Anna Falkenberg fekk 5.304 atkvøður. Tilsams gevur tað 16.127 atkvøður, sum svara til 55,4 prosent av teimum 29.111 atkvøðunum, sum vóru latnar á fólkatingsvalinum.

Onkrar villur

Malan Johansen er forkvinna í bæði fólkatingsvalnevndini og í løgtingsvalnevndini. Sambært henni vóru nakrir feilir íkomnir, tá valið var uppgjørt valkvøldið, og tað var mest tí, at onkrar atkvøður vóru bólkaðar skeivt. Men tað er nú rættað, og endaliga úrslitið verður rættað samsvarandi.

Tá fínteljingin av fólkatingsvalinum var liðug, var beinanvegin farið undir at fíntelja løgtingsvalið. Tað er ein drúgvari tilgongd, tí tað vóru nógv fleiri valevni til løgtingsvalið, enn tað vóru til fólkatingsvalið.

27 fólk fíntelja

Spurd, nær hon roknar við, at endaliga úrslitið av løgtingvalinum verður liðugt, sigur hon, at tað verður einaferð í dag, men tað verður neyvan fyrr enn fram móti nátturðatíð. 

Malan Johansen greiðir frá, at 27 fólk taka sær av fínteljingini, sum er á Hotel Hafnia. Saman við henni eru Bárður Larsen og Ingibjørg Berg, sum eisini bæði sita í báðum valnevndunum, og so 24 onnur fólk, sum telja upp.