Iranski forsetin: 14 milliónir fólk til reiðar at lata lív fyri landið

- 14 milliónir iranar, eg íroknaður, hava boðið okkum fram at ofra okkara lív í krígnum.

Tað sigur iranski forsetin, Masoud Pezeshkian.

- Meira enn 14 milliónir iranar hava higartil sagt seg vilja at lata lív sítt til tess at verja Iran. Eg havi eisini verið, eri og eri framvegis til reiðar at lata lív fyri Iran, skrivar Pezeshkian á X í dag.

Hetta er tvífalt so nógv sum tað, ið almennir miðlar áður hava skrivað um sjálvboðin, sum myndugleikarnir hava útvegað í sms-boðim og fjølmiðlum undir krígnum. 

Sláa manngarð um orkuverk

Iranskir myndugleikar hava eisini heitt á ungar iranar um at sláa manngarð kring orkuverkini, fyri at verja tey.

Yvirlýsingin kemur beint undan freistini, sum amerikanski forsetin, Donald Trump, hevur sett Iran at lata upp Hormuzsundið. 

Ger Iran ikki tað, hevur Trump hótt við at bumba orkuverk og brýr í Iran.

Í Iran búgva góðar 90 milliónir fólk.

Stórt mannfall í krignum móti Irak

Í krígnum móti Irak í áttatiárunum manglaði Iran hernaðarútgerð, men ikki fólk. Tá vóru túsundtals og aftur túsundtals fólk send til gongu yvir irakisk minuøki og beint í skotbardaga. Risastóru bylgjurnar av fólki - og teirra millum nógv børn - tryggjaðu iranska framgongd, men við risastórum menniskjaligum tapi.

Í krígnum, sum er nú, brúkar Iran eisini børn, sigur Human Rights Watch, sum hevur skjalprógv fyri, at 12 ára gomul er innkallað í tænastu og skulu "verja heimlandið".