Mjølnir ikki við: Fuglfirðingar ímóti sørvingum í steypafinaluni hjá monnum

ÍF sendi Mjølnir úr steypakappingini í hálvfinalunum, men fuglfirðingar mugu finna seg í, at SÍ er favorittur í finaluni við Tjarnir leygardagin.

Sørvingar hava nevniliga vunnið heili 21 ferðir á rað í lands- og steypakappingini eftir eina eitt sindur trilvandi byrjan, tá teir millum annað taptu ímóti júst ÍF í allarfyrsta dystinum í kappingarárinum.

SÍ EISINI: ÍF koppaði sigursvandu klaksvíkingunum

Í innanhýsis finaluhagtølunum er ÍF eitt sindur frammanfyri. Fuglfirðingar hava vunnið seks av teimum níggju finalunum, sum liðini hava spælt ímóti hvørjum øðrum. Tilsamans hevur ÍF vunnið níggju og SÍ vunnið sjey steypafinalur.

Styttri er kortini liðið, síðan SÍ vann steypakappingina, tí í 2024 vunnu vágamenninir 3-1 á Mjølni. ÍF vann seinast í 2021, tá fuglfirðingar vunnu 3-2.

TB aftur í finaluni

Fyri fyrstu ferð síðan 2017 er TB í steypafinaluni hjá kvinnum. Tað gjørdist greitt, tá suðuroyingarnir sendu Fleyr í kappingini farna vikuskiftið eftir ein spennandi fimmsettara.

SÍ EISINI: Mjølnir fekk uppreisn eftir FM-finalutap

TB hevði sína stórheitstíð fyrst í fyrru helvt av nullunum, tá kvinnurnar vunnu fýra steypafinalur, og í 2017 løgdu tær eitt steypagull afturat. Tvey ár frammanundan vann TB føroyameistaraheitið.

Mjølnir vann steypagullið í fjør, og í ár eru klaksvíkingar aftur í finaluni eftir 3-0 hálvfinalusigur á FM-vinnarunum úr SÍ síðsta vikuskiftið.

Kvinnurnar úr Klaksvík eru favorittar leygardagin. Tær hava vunnið allar dystirnar ímóti TB í ár uttan at tapa sett, og taptu bert tveir dystir í landskappingini yvirhøvur, áðrenn tær taptu 2-0 í FM-finalunum ímóti  SÍ.

Fyri fyrstu ferð verða steypafinalurnar í flogbólti leiktar í høllini við Tjarnir.