Hákun brendi í brotskastskappingini - Füchse Berlin kortini víðari í CL

Hákun West av Teigum brendi úr sjey metrum í avgerandi brotskastskappingini, tá Füchse Berlin og Veszprem spældu um pláss í Champions League-hálvfinalunum mikudagin. 

Lukkutíð fyri føroyska landsliðsvongin, tók liðfelagin í málinum Dejan Milosavljev tvey brotskøst, og so vann týska høvuðsstaðarfelagið spennandi dystin og skal eins og í fjør spæla Final Four um flottasta evropeiska steypið.

Veszprem var eitt mál frammanfyri undan seinnu fjórðingsfinaluni, sum var í Max-Schmeling-høllini í Berlin, men heimaliðið byrjaði sum eitt óløgi. 

Hákun West av Teigum skoraði til bæði 4-1 og 5-1, men skjótt nærkaðust ungararnir, og eftir steðgin javnvigaði dysturin á eini knívsegg. Hann endaði 31-30 til týskararnar, og so skuldu brotskøst til. 

Nils Lichtlein og Tim Freihofer høvdu skorað, meðan Veszprem longu hevði misnýtt tvær ferðir, tá Hákun West av Teigum skuldi skjóta triðja brotskastið hjá Füchse Berlin.

Málverjin bjargaði skotinum niðarliga til vinstru frá landsliðsvongurin, men tá bæði Tobias Grøndahl og Mathias Gidsel skoraðu, kundi Hákun West av Teigum anda lættan um enn eitt pláss í Champions League-endaspælinum.

Barcelona sendi Nantes úr kappingini, meðan Aalborg vann við einum máli samanlagt ímóti Sporting. Í morgin er Magdeburg stórfavorittur at taka fjórða plássið, tá krútsterka týska liðið hevur eina sjey máls leiðslu við sær til heimadystin ímóti Pick Szeged.