Stórur áhugi fyri Tonik, sum er fyri fjórðu ferð

Fríggjadagin verður ráðstevnan Tonik fyri fjórðu ferð. Talan er um ráðstevnu har vinnulív, íverksetan og tøkni eru í hásæti, men eisini list og kreativitetur spælir ein stóran leiklut.
Endamálið við stevnuni er millum annað at skapa ein pall, har fólk kunnu hittast fyri at fáa íblástur og deila hugskot og hugsanir. 

1000025776.jpg

Rebecca Rógadóttir Petersen, ið hevur gjørt hesa ballóninstallatiónina, er eitt av listafólkunum, ið luttaka á Tonik

Tað eru Hugskotið, Vinnuframi, Íverksetarahúsið, Framtak og Vinnumálaráðið, sum skipa fyri Tonik, og saman hava tey ment eitt konsept, har kreativitetur og list mynda vinnulívsráðstevnuna: 

- Sera nógv dugnalig listafólk eru í Føroyum, og kreativitetur er neyðugur fyri nýskapan í vinnulívinum. Tí valdu vit at leggja dent á bæði vinnulív, íverksetan, tøkni, kreativitetet og  list, tá vit mentu ráðstevnuna. Hetta skilir eisini Tonik frá øðrum vinnulívsráðstevnum, og er nakað sum útlendingar hava lagt til merkis og tykjast at dáma, siga fyriskipararnir Sóleyg Heradóttir Hammer, Súsanna Laursen og Greg Worley. 

tonik_lounge.png

Fyriskipararnir leggja stóran dent á list og listprýði fyri at skapa eitt inspirerandi umhvørvi har sambond og hugskot kunnu mennast

Stórur áhugi fyri Tonik úr útlandinum
Yvirskriftin fyri Tonik í ár er "The next wave", og í ár verður dentur lagdur á innovatión, nýskapan og hvussu nýggir tankar og tøkni eru við til at skapa framtíðina. 

Skráin fevnir um eini 36 fyrilestrarhaldarar og fólk, ið eru við í pallborðskjakum og 15 listafólk. Fyrireikararnir vænta yvir 700 luttakarar í ár, og 200 av teimum eru útlendingar.

1000025760.jpg

Sigrun Gunnarsdóttir, er millum listafólkini, ið luttaka á Tonik.

Fleiri av teimum, ið halda fyrilestrar, eru nógv umbiðin uttanlands - eitt nú Ajit Jaokar, ráðgevi innan AI, Sander Hoogendoorn, tøknistjóri í IBOOD, Ernesto Ciorra, ráðgevi innan nýskapan, burðardyggleika, kreativitet og virkismenning og Steve Rader,  ið starvast hjá NASA og sum ráðgevi.  

- Vit merkja at fleiri fólk kenna til Tonik, nú ráðstevnan hevur verið í nøkur ár, og áhugin hjá altjóða viðurkendum fyrilestrarhaldarum at koma á Tonik er stórur, siga fyriskipararnir Sóleyg Heradóttir Hammer, Súsanna Laursen og Greg Worley.

1000025774.jpg

1000025780.jpg

1000025781.jpg

1000025777.jpg

Lurta eftir samrøðu við Sóleyg Heradóttir Hammer og Súsannu Laursen, fyriskiparum:

Til ber at lesa meira um tiltakið á tonik.fo

Hvat: Kultura
Hvar: Í útvarpinum og á KVF Ljóð
Nær: Mikudagar kl. 17.05 í útvarpinum, og tá tað passar tær á KVF Ljóð