Johnny í Grótinum formaður í grønlendsku nýskipanarnevndini

Johnny í Grótinum er valdur til formann í nýggju nýskipanarnevndini í Grønlandi, sum skal koma við tilmælum um, hvussu tað almenna kann skipast betur.

Nevndin er sett av grønlendska landsstýrinum, Naalakkersuisut, og hevur 10 limir.

Aftrat Johnny í Grótinum, er Magni Laksáfoss eisini limur í nevndini.

Í arbeiðið sínum skal nýskipanarnevndin hjálpa til at framtíðartryggja almenna geiran í Grønlandi.

Nevndin skal millum annað greina uppgávubýtið millum land og kommunur - og kanna, hvussu nýggj tøkni og vitlíki kunnu hjálpa at loysa almennar uppgávur.

Eftir ætlan skal nevndin í fyrsta ársfjórðingi næsta ár lata úr hondum eina frágreiðing um ítøkilig tilmæli, sum kunnu setast í verk í fyrsta umfari.

Endaliga frágreiðingin hjá nevndini verður væntandi liðug fyrra hálvár 2028. Hon verður síðan grundarlagið undir politiska arbeiðnum at gera nýskipanir í almenna geiranum.