Clickhaze spælir tvær konsertir afturat í ár

Fagnaðarorðini mundu ongan enda fingið eftir konsertina, ið legendariski rokkbólkurin Clickhaze spældi á G! festivalinum í ár. 

Konsertin var tann fyrsta hjá Clickhaze eftir 23 ára steðg, men bólkurin spældi betur enn nakrantíð.

Ummælarar nærmast duttu um hvønn annan við lovprísan av konsertini og legendariska bólkinum. 

Frá 'Skirvin flá' førkaðu vit okkum beint inn í stórhittið 'Daylight', ið vísti, at bólkurin eisini dugdi at skriva stórfingin indiepoppløg við altjóða formati. "Holding on to grace, and the beauty of her face" sigur niðurlagið, og tað er vorðið eitt mantra hjá mongum okkara, tí hvat annað er í at gera í hesi umskiftiligu og óstøðugu verð? Tárini trillaðu, og felagssangurin ljómaði. Tað sálmakenda og lovprísandi hevur altíð gingið síð um síð við tað dapra og eksistentialistiskt atfinningarsama í tónleikinum hjá Clickhaze. Har er javnvág í. 

Knút Háberg Eysturstein, Heilabrim

LES EISINI: G! 2026: Sorrig og glæde

Clickhaze

Tvær konsertir afturat

Clickhaze boðar nú frá tveimum konsertum afturat í september. 

Fríggjakvøldið 4. september spælir Clickhaze í OY í Havn, og leygarkvøldið 5. september spælir bólkurin konsert í Mentanarhúsinum í Fuglafirði. Hendan seinna framførslan er partur av árligu Mentanardøgunum.

Talan er um tvey serstøk høvi at uppliva bólkin aftur á palli.

Atgongumerkini fara til sølu fríggjadagin 14. august á middegi kl 12.00 á ávikavist oy.fo og mh.fo.

Clickhaze, G! 2026