Samstarvið við Russland aftur á breddan

Fram móti ársenda í fjør varð nýggjur fiskiveiðisáttmáli millum Føroyar og Russland gjørdur fyri eitt ár. Tað merkir, at sáttmálin skjótt gongur út, og nýggjur sáttmáli skal gerast.

Ella ikki. Tí enn sum áður er ein stórur partur av samgonguni ímóti at hava nakað fiskiveiðisamstarv við Russland.

Í fjør valdi Aksel V. Johannesen, løgmaður, at leingja samstarvið, tí tað sambært honum var ein meiriluti fyri tí í øllum Løgtinginum, hóast hansara egni flokkur og eisini partar av hinum samgonguflokkunum vóru ímóti tí.

Ein av teimum, sum hevur talað harðast ímóti fiskiveiðisamstarvinum við Russland, er Liljan Weihe, limur í uttanlandsnevndini. Hon hevur ikki broytt støðu síðan í fjør.