SF25: "Vit vilja heldur gleða gestirnar enn ummælararnar"

Erik Biskupstø, fyriskipari av Summarfestivalinum, er ikki samdur í, at tað forpliktar at borðreiða við betri og fleiri útlendskum nøvnum, tá mann hevur landsins størsta pall og áhoyrarafjøld á Vágsbøi. 

"Um vit kunnu fáa fólkini við og Una Leitisstein Hansen, ummælarar, ímóti okkum, so velji eg heldur tað enn øvut, at fáa fólkini ímóti okkum, og Una Leitisstein er nøgdur," staðfestir Erki Biskupstø, fyriskipari av Summarfestivalinum, eitt sindur speirekandi. 

Sum at sletta vatn á gás

Í greinini "SF25: 10 ting tú mást hoyra á Summarfestivalin" her á síðuni verður róð framundir, at útlendski parturin av ársins Summarfestival skrá er heldur soltin.

Tað eru bara trý útlendsk nøvn á Summarfestival skránni, og í ár eru tey ein útbrótarabólkur frá UB40 við einum fyrrverandi sangara á odda, donsku Nik & Jay, ið hava spælt í Føroyum rættiliga ofta, og so ein eysturríkari hvørs claim to fame er, at hann hevur endurinnspælt Neil Diamond-sangin "Sweet Caroline" frá 1969 og "Hey! Baby" hjá Bruce Channel frá 1961.

Atfinningarnar eru sum at sletta vatn á gás. 

"Vit smæðast als ikki við skránna, og vit halda eisini tað at undirtøkan vísir tað, at fólk eru øgiliga væl nøgd við skránna. Men vit fáa ikki altíð ummælararnar við okkum, men tað ger einki soleingi vit hava fólkið við," er aftursvarið frá Erik Biskupstø, fyriskiparar. 

SÍ EISINI: Erik Biskupstø: "Vit eru væl nøgd við ársins Summarfestival skrá"