Stjórin um EHF og IHF: Vita meir um EM í Oslo enn HM í Trier

Tað er ein ávísur munur á evropeisku hondbóltssamgonguni EHF og altjóða hondbóltssamgonguni IHF.

Tað sigur stjórin í Hondbóltssambandinum Andrass Thomsen, nú eitt føroyskt A-hondbóltslandslið spælir við um heimsmeistaraheitið fyri fyrstu ferð.

EHF skipar fyri EM-endaspølunum, har bæði menn og kvinnur hava kappast síðstu árini, meðan HM kemur undir veingjabreiðið hjá IHF.

 - Hjá EHF er alt øgiliga væl skipað. Tú færst alla kunningina í øgiliga góðari tíð, og eg haldi, at til beint áðrenn vit fóru avstað, vistu vit meir um EM í Oslo enn HM her í Trier, sigur Andrass Thomsen.

 - Tað var kanska eisini meir stórsligið hjá EHF, sigur HSF-stjórin, sum kortini letur væl at umstøðunum í lítla týska býnum, har føroyska ferðalagið býr beint við síðuna av høllini, har venjing og dystirnir í bólkaspælinum vera.