Venjarin: Verjuspælið verður avgerandi ímóti Montenegro

Um tað skal eydnast Føroyum at fáa eitt gott úrslit ímóti Montenegro í annaðkvøld, skal verjuspælið sita. 

Tað sigur venjarin Claus Mogensen, sum eisini staðfesti, at hann hevði eitt sjúku- og skaðafrítt lið til venjing um middagsleitið.

 - Tað er greitt, at um tey skora 35 mál, verður tað torført at vinna, so verjuspælið hevur sjálvandi høga raðfesting, segði venjarin beint eftir venjingina.

 - So fáa vit ein góðan verjuinnsats geva vit okkum sjálvum ein møguleika at fáa okkurt burturúr.

Montenegro vann 32-26 á Føroyum í EM-undankappingardystinum við Tjarnir í oktober, tá føroyingarnir høvdu serliga ilt við at steðga spælskiparanum Matea Pletikosić og sterku strikuni Tatjana Brnovic.

Í álopinum verður Jana Mittún aftur í høvuðsleiklutinum, men venjarin leggur dent á, at Súna Krossteig Hansen og Maria Pálsdóttir Nólsoy eisini skulu taka ábyrgd í ágangandi gjøgnumbrotsspælinum, sum riggaði væl seinast.

 - Vit mugu breiða spælið út og forða fyri, at tær sleppa at standa kompakt og spæla upp á kroppsligu styrkini. Vit mugu hinvegin fáa spælið at snúgva seg um skjótar føtur, sigur Claus Mogensen.