Annika: Fantastiskt at gera mítt

Føroyar taptu 32-27 fyri Montenegro í fyrsta HM-dystinum, men fyri Anniku Fríðheim Petersen var innsatsurin meir enn góðkendur.

Málverjin, sum átti barn so seint sum í september, byrjaði uttanfyri, men kom inn lutfalsliga tíðliga og helt Føroyum inni í dystinum við nógvum góðum bjargingum.

 - Tað er heilt fantastiskt. Tað er tað, tú arbeiðir fram ímóti, og so skjótt tú hevur eina bjarging, so følir mann, at mann er inni í dystinum. At kunna hjálpa til er fantastiskt, segði Annika Fríðheim Petersen.

Málverjin iðraði seg sjálvandi um tapið - søgan við mongum misnýttum kjansum endurtók seg tíverri í Trier, men hon var kortini errin av liðnum.

 - Tað er ongantíð stuttligt at tapa, men samstundis eri eg errin av liðnum. Eg haldi, at vit standa saman allar, og sjálvt tá tað gongur illa, sær mann samanhaldið, segði Annika Fríðheim Petersen.