Koma út sum svakar í morgin

Dysturin var á veg inn í avgerandi minuttirnar, tá Elsa og Karin Egholm fingu kjansin frá venjaranum.

Løtu seinni høvdu báðar skotið mál - Elsa tvey og Karin eitt, og søguligi sigurin á Spania var veruleiki. 

 - Tað var ræðuliga stuttligt at spæla, segði Elsa Egholm til seinnapartsvenjingina í dag.

 - Tær blíva ræðuliga troyttar, tá tær spæla so nógv, Jana, Súna og Maria, so tá teimum tørvaði pausu komu eg og Karin inn. Tú skalt bara altíð vera klár, tá tú situr á beinkinum, og tað var knappliga pláss til okkum, segði Elsa Egholm.

Hon lovar, at hóast tað ikki bleiv so nógvur svøvnur eftir Spania-dystin vera tær til reiðar at kempa ímóti Paraguai í sunnudagin.

 - Nú fara vit at hyggja at video og fyrireika okkum, og so koma vit út sum svakar í morgin og ætla okkum at vinna í morgin, segði Elsa Egholm.

Dysturin ímóti Paraguai byrjar klokkan 14.30, og Kringvarpið byrjar at senda klokkan 13.45.