H71 meistari: Dreingjadreymurin gjørdist veruleiki

Meistaraheitið hjá H71 var ein dreingjadreymur, sum gjørdist veruleiki, fyri blaðunga Boas E. á Skipagøtu.

 - Eg havi droymt um hetta, síðan eg var heilt lítil og stóð uppi í "black army", so hetta er heilt for****** skeg, segði unga stjørnuskotið, sum við níggju málum spældi ein týðandi leiklut í triðju og avgerandi FM-finaluni ímóti Kyndli um vikuskiftið.

Í fjør eydnaðist júst Kyndli at vinna á H71 í finalurøðini, sum tá kravdi fimm dystir. Júst tí var hetta meistaraheitið so gott, helt Høgni Heinason.

 - FM er tað størsta, man kann vinna í Føroyum, so tað er absolutt tað, sum vit hava arbeitt harðast fyri, og at vit vinna tað ímóti Kyndli, sum vit taptu fyri í fjør, ger tað eyka feitt, segði stinni bakspælarin, sum var ársins spælari í fjør.