G! 2026: "Í vetur hoyrdu fólk í Syðrugøtu malagrót, tá tey løgdu seg"

G! festivalurin er farin av bakkastokki. Klokkan 16 byrjaði sjónleikurin "Upphav" í Fjósinum, sum er fyrsta almenna tiltakið á G! festivalinum 2026. 

Hóast festivalurin hevur upplivað avbjóðingar, eitt nú við andlátinum hjá altjóða høvuðsnavninum, Oliver Tree úr USA, so letur Høgni Lisberg, tóleikastjóri, væl at skránni og festivalinum. 

"Vit hava ikki áður roynt, at tónlistafólk doyggja undan okkum, so tað var ein stórur sorgarleikur, tí tað var ein ungur maður, ið fór frá okkum. Men annars eri eg væl nøgdur við skránna í ár."

Høgni Lisberg nevnir serliga fyrstu konsertina á Sandinum við Dan Olsen, sum nakað serligt. 

"Dan Olsen hevur ikki spælt í Føroyum síðani 2015, so tað verður spennandi at hoyra hann. Vit royna at gera fyrstu konsertina á Sandinum til nakað serligt. Í fjør var tað Beinir, ið fekk heiðurin, og í ár er tað Dan Olsen. Eg haldi eisini, at fólk taka væl ímóti hesum."

Sandurin í Syðrugøtu hevur verið óvanliga lítil upp undir G!. 

“Í vetur var sandurin í so lítil, at fólk í Syðrugøtu hoyrdu malagrót, tá tey løgdu seg at sova um kvøldið. Men nú sær hann gott út, og tey átøk, ið vit hava gjørt, hava hjálpt."