WHO: Ov tíðliga at koma við niðurstøðum

Heimsheilsustovnurin, WHO, kom ikki við nakrari niðurstøðu eftir fundin, sum stovnurin hevði um virussjúkuna, sum er staðfest í Kina, og sum hevur breitt seg til nøkur lond.

– Vit vita ov lítið um virusið, til at gera nakra niðurstøðu. Tað sigur ein talsmaður fyri heimsheilsustovnin, World Health Organization.

Virusið varð staðfest í Wuhan í Kina 31. desember, og síðani tá eru 17 fólk deyð, og millum 400 og 500 fólk eru sjúk. Virusið hevur í minni mun breitt seg til Tailand, Japan, Taivan, Suðurkorea og USA.

 >> SÍ EISINI Nýtt virus breiðir seg til onnur lond

Tí eru boð givin um, at fólk í Wuhan ikki mugu fara úr býnum, og í dag eru bæðu flogferðir og jarnbreytaferðslan til og úr býnum steðgað.

16 serfrøðingar eru boðsendir av Heimsheilsustovninum til at fáa greiðu á, hvat fyri virus talan er um, men teir kundu eftir fundin í gjár ikki koma við nøkrum greiðum svari.

Tí fer Heimsheilsustovnurin, WHO, aftur at hava fund í dag, fyri at royna at fáa greiðu á støðuni, sigur formaðurin fyri Heimsheilsustovnin.