Umsetningurin hjá FSF omanfyri 50 milliónir

Fótbóltssambandið hevði 650.000 krónur í yvirskoti í fjør.

Samlaðu inntøkurnar hjá FSF í fjør vóru góðar 51,6 milliónir, og útreiðslurnar smáar 51 milliónir.

Tað staðfesti Christian Andreasen, FSF-forseti, í síni formansfrágreiðing á aðalfundinum hjá Fótbóltssambandinum í gjár.

Eginognin hjá FSF er nú 31,5 milliónir krónur.

Í formansfrágreiðingini upplýsir Christian Andreasen, at stóra útbyggingin av Tórsvølli verður liðug 21. februar næsta ár.

Arbeiðið, sum nú verður gjørt við vesturskýlinum, er síðsti liður í, at Tórsvøllur skal røkka ásetingini fyri leikvøllir til altjóða landsdystir. Tað er tann sonevnda "category 4".

Hetta arbeiði kostar 144 millionir krónur. Av hesum rindar Tórshavnar kommuna 63 milliónir, evropeiska og altjóða fótbóltsambondini UEFA og FIFA rinda tilsamans góðar 70 milliónir og Fótbóltssambandi sjálvt smáar 11 milliónir.

Í formansfrágreiðingini upplýsir FSF-forsetin, at tá Tórsvøllur er liðugt útbygdur, hevur samlaða útbyggingin kostað umleið 270 milliónir krónur.