Fundir um Suðuroyartunnil og Landssjúkrahúsið

Rættarnevndin og fíggjarnevndin hjá løgtinginum hava fund í dag.

Báðar nevndirnar vilja tosa við Jørgen Niclasen, landsstýrismann í fíggjarmálum, rættarnevndin um partafelag, sum skal gera undirsjóvartunnil til Suðuroynna, og fíggjarnevndin um Landssjúkrahúsið.

Fólk frá Landsverki vera við á báðum fundunum.

Níggju mál

Rættarnevndin hevur níggju mál á skránni í dag, millum annað náttúrumargfeldislógina, dátuverndarlógina, innlit í almenn partafeløg og føroyskt sum rættarmál burturav.

Fíggjarnevndin hevur tvey mál á skránni, høvuðsumvæling, útbygging og nútíðargerð á Landssjúkrahúsinum og broyting í skattalógini til frama fyri heimavirki.

Nevndin hevur eisini givið byggifeløgunum MT Højgaard og Articon og Ráðgevarafelagnum fundarboð, tí nevndin hevur spurningar um Landssjúkrahúsið.