Óvissan um fiskiskapin er stór

Fiskiskapurin heldur fram, men óvissan er stór, sigur Fiskamarknaðurin.

Fiskamarknaðurin er opin, men bara helvtin av fólkinum arbeiðir í senn.

Bara tvey línuskip eru úti, sum fiska tosk, hýsu og longu, og á Fiskamarknaðinum vænta tey, at annað avreiðir í dag og hitt helst seinni í vikuni.

Frystilínuskipini eru øll til fiskarí.

Um útróðurin sigur Fiskamarknaðurin, at streymurin er ikki av tí besta, og veðrið og korona gera, at ikki verður so nógvur útróður.

Trolararnir eru úti

Tríggir djúpvatnstrolarar eru úti. Ein fiskar tosk og hýsu, ein fiskar stinglaks og ein fiskar svartkalva. 

Flestu partrolarar eru úti, men teir fáa lítið.

Fimm trolbátar fiska norðanfyri. Teir fiska fyrst og fremst tosk og so nakað av hýsu, upsa og flatfiski. 

Allir trolarar koma inn at avreiða í hesari vikuni. 

Trý garnaskip fiska svartkalva, og eitt av teimum avreiðir í dag, meðan hini væntast seinni í vikuni.