Korona: Tíggju smittað afturat, fimm vorðin frísk

Tað eru nú tilsamans 132 føroyingar, ið hava fingið staðfest koronasmittuna. Tað boða myndugleikarnir frá á corona.fo.

Harvið hava tíggju føroyingar afturat fingið staðfest smittuna seinasta samdøgrið.

38 vorðin frísk

Samstundis eru fimm føroyingar vorðnir frískir, eftir at hava fingið staðfest koronasmittuna. Í løtuni eru tilsamans 38 føroyingar staðfestir frískir. 

Við øðrum orðum hava 94 føroyingar framvegis smittuna, sambært nýggjastu tølunum. Fyri at staðfesta, at smittað fólk eru frísk aftur, skulu ganga tvey samdøgur uttan sjúkueyðkenni.

Tá bera tey ikki smittuna longur og kunnu loysast úr sóttarhaldi. Tvey fólk eru framvegis innløgd á sjúkrahúsi í sambandi við smittuna.