Nú kann norðhavssildin fiskast

Føroyingar kunnu nú fara at fiska norðhavssildina í ár. Kunngerðin varð lýst, og kom í gildi í síðstu viku.

Kvotan í ár er 115.893 tons, 22,05 prosent av mest loyvdu veiðuni, sum ICES mælir til í ár.

Semja varð gjørd um tað við hini strandarlondini í oktober í fjør.
   
Afturat kvotuni í ár koma 710 tons, sum ikki vórðu fiskað í fjør, men eru flutt til í ár.

105.000 tons eftir

Føroyar lata øðrum londum norðhavssild í samráðingum um fiskiveiðurættindi. Eftir til føroysku skipini eru 104.848 tons.

9.851 tons eru sett av til vinnuligar royndir og verkætlanir, sum hava við sær menning, nýskapan og virðisøking.

Føroysk skip kunnu eisini fiska sild í íslendskum sjógvi, ES-sjógvi og í NEAFC-skipanarøkinum.  Føroyski fiskiskapurin í ES-sjógvi er avmarkaður til í mesta lagi 7.000 tons í ár.

Kunnu virka umborð

Í ár er loyvt at virka sildina umborð.

Virking umborð er sambært kunngerðini, tá fiskurin er meiri viðgjørdur enn sløgdur ella avhøvdaður, sama hvussu hann er goymdur.