Uppskot: Smidligari at ferðast millum Norðurlond

Eitt føroyskt uppskot um COVID-19 kanningar fær góða undirtøku í hinum Norðurlondunum. Norðurlendsku stjórnarleiðararnir høvdu videofund í gjár um koronu.

Bárður á Steig Nielsen, løgmaður, kom við uppskoti um, at londini góðkenna COVID-19 kanningar, sum eru gjørdar í øðrum Norðurlandi, so lættari verður at ferðast millum londini.

Arbeiða víðari við málinum

Uppskotið fekk jaliga móttøku. Stjórnarleiðararnir samdust um at biðja heilsumálaráðharrarnar arbeiða víðari við málinum, sigur Løgmansskrivstovan.

Stjórnarleiðararnir harmaðust um, at neyðugt var at steingja landamørkini í Norðurlondum. Men hetta var undantaksstøða, sum ikki skal gera norðurlendska samstarvið veikari. 

Løgmaður kunnaði hinar stjórnarleiðararnar um norðurlendsku ráðstevnuna um COVID-19, sum landsstýrið hevur í Føroyum í heyst.