Løgreglan leitar eftir vitnum

Tað var um trý tíðina leygarmorgunin, at løgreglan fekk boð um ein mann, sum skal hava verið fyri harðskapi í miðbýnum í Havn.

Vitni, sum løgreglan hevur tosað við, siga, at maðurin varð sparkaður í andlitið, ímeðan hann lá avdottin í Steinatúni.

Skaða í andlit

Maðurin, sum er í 20-unum, hevur fingið skaða í andlitið og hevur tað annars toluligt eftir umstøðunum eftir álopið.

Vitni siga seg hava sæð mannin blíva sparkaðan, men umframt tað, veit løgreglan ikki nógv um harðskapstilburðin fyrranáttina.

Løgreglan hevur tískil heldur ikki nakra lýsing av teimum trimum monnunum, sum vitnu siga seg hava sæð sparka mannin.

Løgreglan vil tí fegin frætta frá fólki, sum kunnu hava sæð okkurt, ið kann hava týdning fyri at loysa málið, sigur vakthavandi á Politistøðini í Havn við útvarpið.