- Tíðindi, mentan og ítróttur
Fomaður í VB: Vil hava stuðul fyri mistar inntøkur
![](https://kvf.fo/sites/default/files/styles/grein-ovasta-mynd/public/bogi_mortensen_mynd.jpg?itok=lubvroON)
Bogi Mortensen, formaður í VB, biðjur nú landstýrið um stuðul fyri mistar inntøkur seinna hálvár 2021.
Hann vísir á, at tilmælini um, at størri tiltøk ikki skulu haldast, hava havt við sær stóran inntøkumiss fyri ítróttarfeløg.
- Inntøkurnar frá hesum tiltøkum eru ein av grundarsteinunum undir rakstrinum og virkseminum hjá feløgunum. Um hesar inntøkur eru mistar, má virksemið skerjast munandi, skrivar Bogi Mortensen á sínum facebook-vanga.
Hann skrivar, at Vágs Bóltfelag metir, at inntøkumissurin seinna hálvár í fjør liggur um 100.000 krónur, og um eingi tiltøk kunnu haldast hetta hálvárið, verða aðrar 100.000 mistar.
Gongur útyvir virksemið
Formaðurin í VB sigur, at um gongdin heldur fram, og felagið ikki fær stuðul frá landinum, fer tað millum annað at ganga útyvir ungdómsarbeiðið.
- Felagið hevur nú í fleiri ár havt løntar venjarar at standa á odda fyri ungdómsarbeiðnum saman við lokalum kreftum. Hetta má felagið velja frá, um tað ikki fær endurgjald fyri mistar inntøkur, skrivar Bogi Mortensen.
- Í mun til Fíggjarlógina er talan um eina sera lítla upphædd, men fyri feløgini kann tað verða lív ella deyð.