Nýggj strandfaraskip viðgerast á tingfundi í dag

Strandfaraskip landsins eru á skránni hjá løgtinginum í dag. Tjóðveldi hevur lógaruppskot um at byggja fýra skip fyri 330 mió. kr. til Strandferðsluna.

Sambært uppskotinum skal nólsoyarskip byggjast fyri 90 til 100 mió. kr. og kalsoyarferja fyri tað sama, 90 til 100 milliónir.

Skip til Fugloynna og Svínoynna skal byggjast fyri 45-50 mió. kr. og 45-50 milliónir skulu eisini brúkast til skúgvoyarskip.

Sambært uppskotinum skal Sam vera farmaskip hjá teimum smáu oyggjunum. Hann skal umbyggjast fyri 25-30 mió. kr.

Nólsoyarskipið skal byggjast fyrst sambært uppskotinum. Og Teistin skal seljast, tá Sandoyartunnilin er liðugur í 2023.

Av tí at fyrireikingarnar til Suðuroyartunnilin eru farnar í gongd, roknar Tjóðveldi ikki við nýggjari ferju til suðuroyarleiðina.

Tjóðveldi ætlar, at arbeiðið skal byrja longu í ár, og hevur tí uppskot um eykajáttan, sum er 30 mió. kr., til projektering og aðra fyrireiking.

Annars mælir flokkurin til at játta 60 mió. kr. um árið árini 2022 til 2026. 

Tingið fer í dag endaliga at samtykkja, at berghol skulu gerast norður um Fjall í Borðoynni fyri 522 mió. kr. og at byggja sambýlið á Mýrini í Hoyvík.

Tingfundurin í dag er klokkan 13:30.