Føroyar møta Luksemborg, Italia og Lettlandi

Luksemburg, Italia og Lettland verða mótstøðuliðini hjá Føroyum í i 1. umfari av undankappingini til HM-endaspælið í 2023, sum verður í Svøríki og Póllandi, skrivar Hondbóltssambandið á facebook.

Tað er greitt eftir lutakastið, sum var fyri løtu síðani. Liðini úr fjórða styrkisbólki, harímillum Føroyar, fingu eisini fyrsta rætt at skipa fyri undankappingini, um bólkurin verður leiktur sum ein kapping yvir eitt vikuskiftið.

Føroyar vóru í bólki saman við Luksemborg í seinastu HM-undankappingini, og ta ferðina vunnu Føroyar 24-22. Í undankappingini til HM í 2018 hittust Føroyar og Italia. og tá vann Italia stórt, 29-18. 

Lettland var við í EM-endaspælinum fyri fyrstu ferð í 2020, har lettar taptu allar dystirnar og endaðu aftast.

16 lið eru við í 1. umfarið, og tey vórðu býtt í fýra bólkar. Tvey tey ovastu liðini í hvørjum bólki spæla seg víðari til play-off dystir ímóti liðunum, sum eru hægri styrkismett.