Spartak Moskva verður tveitt úr Evropa League

UEFA fer at tveita russiska fótbóltsfelagið, Spartak Moskva, úr Evropa League-kappingini, skrivar Skysports.com.

Felagið skal eftir ætlan spæla í áttandapartsfinalunum ímóti týska liðnum, RB Leipzig, í mars, men sambært Sky í Týsklandi, verða dystirnir ikki spældir, og RB Leipzig fer í fjórðingsfinalurnar uttan dyst. UEFA hevur ikki váttað tíðindini enn.

Orsøkin til avgerðina hjá UEFA er russiska innrásin í Ukraina. 

FIFA útihýsir ikki Russlandi

Fótbóltslandsliðini hjá Kekkia, Svøríki og Póllandi nokta øll at spæla dystir ímóti Russlandi. 

Play-off dystir um HM-pláss í Quatar vóru annars á skránni í mars.

Altjóða fótbóltssamgongan, FIFA, vil kortini ikki tveita Russland úr kappingini. Í staðin hevur FIFA skotið upp, at Russland kann spæla á uttanveltaðum vølli uttan áskoðarar, undir øðrum navni (RFU) og ikki undir egnum flaggi.

Bæði Svøríki og Pólland hava endurtikið, at tey spæla ikki ímóti Russlandi undir nøkrum umstøðum.