Finskur og svenskur limaskapur kann avgreiðast skjótt

Tað kann ganga skjótt hjá Svøríki og Finnlandi at fáa limaskap í NATO, um londini vilja tað.

Tað sigur aðalskrivarin í NATO, Jens Stoltenberg.

Orðaskiftið í NATO fyllir nógv millum fólk, bæði í Finnlandi og í Svøríki, eftir russisku innrásina í Ukraina.

Og mett verður, at støðan hjá Svøríki verður ótolandi, frá tí at landið søkir um limaskap, til landið fær limaskap, boðar SVT frá.

Finna verjuloysnir

- Eg veit ikki, hvussu drúgva viðgerð ein svenskur limaskapur í NATO skal hava, men tað ber til at bera skjótt at, um sviar vilja tað, sigur Stoltenberg.

Hann sigur við svenska útvarpið, at tað eisini ber til at finna loysnir, so Svøríki verður vart, meðan umsóknin um limaskap verður viðgjørd.

Hann vísir á, at bæði Svøríki og Finnland hava tætt samstarv við NATO, og at bæði londini halda politisku og hernaðarligu krøvini, sum NATO setur einum limalandi, skrivar NTB.