Íslendski tjóðbankin hevur aftur hækkað rentuna

Íslendski tjóðbankin hækkar aftur rentuna.

- Vónandi er hetta seinastu ferð í hesum umfarinum, at rentan hækkar, sigur stjórin í Seðlabanka Íslands, Ásgeir Jónsson, við íslendska kringvarpið, RÚV.

Leiðandi rentan hjá íslendska tjóðbankanum hækkaði 0,25 prosent í gjáramorgun. Rentan er nú 5,75 prosent. 

Eftirlitið hjá tjóðbankanum vísir, at nógvu rentuhækkingarnar seinastu mánaðirnar hava minkað um keypihugin hjá íslendingum og gjørt, at stígur er komin í bústaðarmarknaðin, júst sum ætlanin hjá stjórnini var.

Ásgeir Jónsson - Mynd: dv.is

Ásgeir Jónsson er tjóðbankastjóri í Íslandi (Mynd: DV.is)

Inflatiónin 9,3 prosent

- Inflatiónin í Íslandi er enn stór. Hon er 9,3 prosent. Tí halda vit, at vit mugu hækka rentuna aftur. Men samstundis síggja vit, at inflatiónin minkar, og at tað gongur rætta vegin, sigur Ásgeir Jónsson.

- Bústaðarmarknaðurin er ikki steðgaður upp, men íslendingar hugsa seg væl um, tá ið ræður um prís og keypiorku. Gongst sum ætlað, fer gongd at koma aftur á húsasøluna skjótt, sigur stjórin í Seðlabankanum, og leggur aftrat: 

- Mín meting er, at inflatiónin lækkar, og at bústaðarmarknaðurin kølnar eitt vet. Hetta fer at minka um fíggjarliga vøksturin í samfelagnum og steðga prísvøkstrinum, sigur Ásgeir Jónsson, stjóri í Seðlabanka Íslands.