Reiðarar ætla í Hægstarætt við málinum um manningar og kvotur

Reiðarafelagið hevur biðið Procesbevillingsnævnet um loyvi at sleppa í Hægstarætt við rættarmálinum um manningar og kvotur.

Tað var í lagi, segði Landsrætturin, tá landsstýrið í 2016 avgjørdi, at manningarnar ikki skuldu gjalda sín part av kvotunum á royndaruppboðssølum í 2016.

Eystari landsrættur broytti tí í september dómin hjá Føroya rætti.

Føroya rættur segði í januar í fjør, at Fiskimálaráðið gjørdi seg inn á sáttmálan hjá manningarfeløgum og reiðarum, tá landsstýrið bað løgtingið áseta við lóg, at manningarnar ikki skuldu vera við í kvotukeypunum.

Dómhúsið, Føroya rættur

Drúgv viðgerð

Reiðarafelagið vann í Føroya rætti. Men Eystari landsrættur gav Fiskimálaráðnum viðhald.

Reiðarafelagið er dømt at gjalda Fiskimálaráðnum 750.000 kr. í sakarkostnaði.

Nú hevur Reiðarafelagið søkt um at sleppa í Hægstarætt við málinum, tí málið er prinsipielt.

Procesbevillingsnævnet brúkar 14 til 16 vikur at viðgera umsóknir um at sleppa at royna mál í Hægstarætti.