Turkaland ætlar at skriva undir avtaluna um Svalbard

Turkaland vísir nú áhuga fyri Svalbard, og turkiski forsetin, Erdogan, hevur skrivað undir eitt uppskot, sum gevur turkum loyvi at liva, búgva, veiða og fiska á Svalbard og havleiðunum við Svalbard.

Fyrst í oktober samtykti uttanríkisnevndin í turkiska tjóðartinginum uppskotið.

Samstundis ætlar Turkaland at skriva undir avtaluna um Svalbard, sum var gjørd í 1920, og sum 44 lond higartil hava skrivað undir.

300 mió. til menningarætlan

Russland vísir eisini størri áhuga fyri Svalbard, og ætlar at nýta 300 milliónir kr. til eina menningarætlan. Sannlíkt er eisini, at Turkaland kann fara at gera íløgur á Svalbard, sigur norski granskarin, Andreas Østhagen.

Svalbard er lýst sum uttanveltað øki. Tað gjørdi norska stjórnin í 1950, og hóast Noreg hevur yvirvaldsrættin, so kunnu fólk úr londunum, sum hava skrivað undir avtaluna, búseta seg og virka á Svalbard.

Biðja um frágreiðing

Norskir politikarar hava biðið norsku stjórnina um eina frágreiðing um turkiska áhugan fyri Svalbard, sigur talskvinnan hjá Høgraflokkinum, Ingjerd Schou.

Hon vísir á, at kríggið í Ukraina hevur havt við sær, at bæði Finnland og Svøríki hava biðið um limaskap í NATO, men Turkaland hevur higartil ikki vilja gingið umsóknunum á møti.

Turkaland hevur seinastu árini gjørt fleiri granskingarferðir til Norðpólin, og eftir eina ferð í fjør, skírdi turkiski professarin, Burcu Øzsoy, leiðina til Norðpólin sum nýggja silkivegin, og gjørdi greitt fyri uttanríkisnevndini í turkiska tjóðartinginum, at ein triðingur av oljuni og gassinum í heiminum er við Norðpólin, skrivar NRK.

Eingin viðmerking

Norska kringvarpið hevur biðið um viðmerkingar til turkiska áhugan fyri Svalbard, men hevur fingið at vita, at eingin viðmerking verður, fyrr enn stórtingið er kunnað um turkisku ætlanirnar.

Hóast turkiska áhugan fyri Svalbard, fær Turkaland ikki atgongd til møguliga olju, gass og fisk á leiðini við Svalbard, sigur norski granskarin.