Málið útsett, tí ákærdi møtti ikki í Landsrættinum

Tað hevði hann boðað verja sínum frá. Hann hevði, sambært ákæruvaldinum, ikki lógligt forfall. Maðurin er dani og er í Danmark. 

Talan er um stóra hassjmálið frá juni í ár, tá 9,3 kilo av hassji komu til Føroya. 

Trý fólk, ein kvinna og tveir menn, vóru dømd í Føroya rætti 7. september. Kvinnan fekk eitt árs og tríggjar mánaða fongsulsrevsing. Hon kærdi alt fyri eitt til Landsrættin við kravi um frídøming. Menninir, annar dani og hin føroyingur, fingu hálvtannað ár og tvey ár.

Allir dómarnir eru treytaleysir. Danin játtaði seg sekan í Føroya rætti.

Ákæruvaldið fór í Landsrættin við øllum trimum dómum. Ákæruvaldið vil hava tey trý dømd eftir revsilógini, tí talan er um grovt lógarbrot. Revsilógin gevur heimild til harðari revsing enn lógin um euforiserandi evni, sum fólkini eru dømd eftir.

Føroyingurin hevur verið í varðhaldi síðani 13. juni. Varðhaldsfongslingin var longd í gjár.