30 ár síðan fyrstu sms-boðini

Í dag eru júst 30 ár síðan fyrstu sms-boðini vórðu send við telefon.

Tað var ungi verkfrøðingurin Neil Papworth, sum 3. desember í 1992 sendi boðini "Merry Christmas" frá síni Orbitel 901 telefon til starvsfelagan Richard Jarvis - sum sostatt bleiv tann fyrsti at fáa eini sms-boð sendandi. Teir arbeiddu báðir hjá ensk-fronsku KT-fyritøkuni Sema Group.

Seinni, tá fartelefonirnar vunnu meir og meir fram, bleiv sms - sum er ein stytting av Short Message Service - ein nógv brúktur samskiftisháttur. 

Í 2010, tá sms-skipanin var upp á tað hægsta, vórðu sambært The World Today send 6,1 trillión sms-boð - tað er tað sama sum 193.000 sms-boð um sekundið.

Síðani hava aðrar tænastur so sum Facebook Messenger og Whatsapp yvirhálað sms-boðini sum mest brúkti máti at samskifta á skrift, men enn ber til at senda sms-boð upp á tann góða gamla mátan, eisini við eini vanligari fartelefon.