Veðrið ávirkar samferðsluna

Vánaliga veðrið ávirkar eisini samferðsluna kring landið og ferðingina út í heim.

Strandfaraskip Landsins boða frá, at fyri veður er fyribils eingin sigling millum Havnina og Nólsoy og millum Skopun og Gomlurætt, og Smyril siglir ikki í morgun.

Og fyri veður er fyribils heldur eingin busskoyring í Suðuroynni, Sandoynni og í øllum meginøkinum, umframt í Kalsoynni.

Og Bussleiðin í Tórshavnar kommunu boðar frá, at leið 5 og leið 6 koyra ikki fyrr enn á middegi.

Flogførini, sum skuldu koma úr Kjøpinhavn og Billund eru útsett til ávikavist klokkan 10.45 og klokkan 11, og somuleiðis eru flogførini úr Vágum til Kjøpinhavn og Keflavíkar útsett til ávikavist klokkan 11 og klokkan 11.50.

Tveir skúlar hava eisini avlýst skúlagongdina í dag. Tað er Runavíkar skúli og Vestmanna skúli.

Norrøna, sum kom úr Hirthals tíðliga í morgun, kemur ikki inn fyrr enn klokkan fimm seinnnapartin, upplýsir Tórshavnar havn.

Norrøna krokar eystan fyri Mjóvanes.

Veðrið er so vánaligt, at ikki er ráðiligt at leggja at, heldur ikki á Signabø.