Svensku kvinnurnar vunnu bronsuna

Svøríki vann bronsuheiðursmerkini, tá dysturin um 3. plássið í HM endaspælinum var spældur í dag.

HM í fótbólti fyri kvinnur nærkast nú endanum, og bert finalan er nú eftir at spæla. 

Svøríki og Australia dystaðust um triða plássið í morgun, og Svøríki vann 2-0. Harvið endaði Svøríki á triða plássið, sum er júst sama úrslit sum til seinastu heimsmeistarakapping. Hetta er í alt, triða ferðin at Svøríki vinnur bronsuheiðursmerkini.

Fyri vertstjóðina Australia gjørdist tað ein keðiligur endi við tveimum tapum, eftir at australsku kvinnurnar eisini taptu í hálvfinaluni ímóti Onglandi.

Hóast hetta hevur stuðulin til heimaliðið verið ovurstórur, og veruligur fótbóltsfebur hevur herja í Australia undir endaspælinum.

Finalan í HM endaspælinum verður í morgin, sunnudagin kl. 11. Tá spæla Spania og Ongland um at vinna heiðurin, sum heimsins besta kvinnulandslið.