Teldusníkar svika 150.000 danir fyri hundraðtals milliónir á hvørjum ári

Á hvørjum ári verða umleið 150.000 danir útsettir fyri talgildum sviki fyri hundraðtals milliónir.

Hetta upplýsir Kriminalpreventiva ráðið í nýggjari herferð, sum skal hjálpa dønum at gerast var við on-line-svik.

Endamálið er at geva fyribrigdinum meira ans, so fólk fara at hugsa seg meira um, sigur formaðurin í ráðnum, Erik Christensen.

- Vit gerast meira og meira talgild, har tað verður alt meira vanligt, at rættiliga nógv fyrigongur talgilt, sigur hann.

Talgilt svik fevnir til dømis um misnýtslu av gjaldskortum, svik við handli, fíggjarsvik, stuldur av samleika og hatursfullar útsagnir.

Flestu svikini fara fram umvegis internetið, har offrini í miðal missa 2.300 krónur.

Herferðin hjá Kriminalpræventiva ráðnum fer fram á sosialum miðlum frá nú síðst í august til oktober.