VEKS: Stjórasetan dregur út

Tað tekur sína tíð at seta nýggjan stjóra í VEKS, sum er kommunala eldrasamstarvið millum Vestmanna, Eiðis, Kvívíkar og Sunda kommunu.

Heimatænastan í VEKS hevur síðan juni í ár søkt eftir nýggjum stjóra, sum skuldi byrja í starvinum tann 1. septembur, men enn er eingin stjóri settur.

Longd freist
Jógvan Kruse, stýrisformaður í VEKS, sigur við Kringvarpið, at ov fáar umsóknir vóru, og tí varð gjørt av at leingja umsóknarfreistina. Tilsamans komu 12 umsóknir.

Setanarsamrøður vóru fyri tveimum ella trimum vikum síðani, og Jógvan Kruse sigur, at í løtuni er setanartilgongd farin í gongd saman við einum av umsøkjarunum.

Spurdur, hví tað hevur tikið so langa tíð at finna ein nýggjan stjóra til VEKS, svarar stýrisformaðurin, at hann ikki hevur fleiri viðmerkingar til málið.