Færri tilburðir av heilabløðingum og blóðtøppum í Noregi

Færri norðmenn fáa heilabløðingar og blóðtøppar í hjartað.

Tað skrivar norska Fólkaheilsustýrið.

Frá 2017 til 2022 eru nýggir tilburðir av blóðtøppum í hjartanum minkaðir 31 prosent hjá kvinnum og 22 prosent hjá monnum.

Heilabøðingar eru minkaðar átta prosent hjá kvinnum og 10 prosent hjá monnum.

- Orsøkin er helst, at færri roykja, hava høgt kolesterol og/ella høgt blóðtrýst, sigur Ester Kringeland, yvirlækni, sum eisini sigur, at viðgerðin er vorðin betri.

Hóast færri tilburðir, doyggja nógvir norðmenn framvegis av hjarta- og æðrasjúku, sum er næst størsta deyðsorsøkin í Noregi.

Stívliga ein fimtingur, 23 prosent, av teimum, sum doyðu í Noregi í fjør, doyðu av hjarta- og æðrasjúku.