Nú er farið at goysa norðanfyri Grindavík

Tað var klokkan 22.16 í gjárkvøldið, at tað byrjaði at goysa úr einari sprung við fjallið Sundhnúka. 

Tað hendi eftir enn ein jarðskjálvta í økinum norðanfyri Grindavík á Reykjanesi. 

Jarðskjálvtin verður hildin at hava verið umleið 4,2 í styrki, og er tann máttmiklasti seinastu vikuna, upplýsir íslendska veðurstovan. 

Soleiðis sær eldgosið út beint nú. 

Tey 4000 fólkini, ið búgva í Grindavík, eru seinastu dagarnar flutt burtur frá býnum. Eisini kendan ferðafólkastaðið Bláa Lónin er eisini stongt. 

Vandi er fyri, at grótbræðingin fer at renna inn í Grindavík, meta serfrøðingar. 

Íslendska heimaverjan er virkin og í hægstu tilbúgvin, skrivar RUV. 

Eldgos í Íslandi, Ísland

Á myndini omanfyri sæst, at eldgosið í Íslandi er við fjøllini Sundhnúkur og Sýlingafell. 

Myndugleikarnir hava stongt høvuðsveg nummar 41, sum eitur Reykjanesbrauten ella Reykjanesarbreytin, og fólk vera biðin um at halda seg burtur frá økinum. 

Talan er ikki um nakað ferðfólkagos, siga serfrøðingar eisini. 

Beint nú er eingin í lívsvanda, sigur lokali løgregluovastin á Suðurnesi, Úlfar Lúðvíksson.

Íslendski forsætisráðharrin, Katrin Jakobsdóttir, sigur við RUV, at nógv er gjørt fyri at verja Grindavík móti eldgosinum og grótbræðingini, og tað fer at gera stóran mun, heldur hon. 

"Tankar okkara eru hjá fólki á staðnum nú eins og áður, og vit vóna tað besta. Men tað er greitt, at hetta kann blíva rættiliga hættisligt, sigur Katrin Jakobsdóttir, sambært RUV.