Maud sleipað til Týsklands

Norska cruise-skipið Maud, sum kom í trupulleikar í Norðsjónum í gjár, verður nú sleipað til Bremerhafen í Týsklandi. Tað skrivar Reuters.

Sambært donskum myndugleikum fekk Maud ein sjógv í gjár, har fleiri rútar á brúnni brotnaðu, og sum tí førdi til, at sjógvur kom inn á brúnna, og at allur streymurin umborð fór. Skipið var tá statt góðar 260 kilometrar frá donsku vesturstrondini og umleið 350 kilometrar frá bretsku eysturstrondini.

Skipið misti ikki maskinorku, og tí bar til at stýra skipinum úr maskinrúminum.

Maud var farin úr Florø hósdagin við kós móti Tilbury í Bretlandi. Veðrið var ringt, og aldurnar vóru millum 7 og 8 metrar høgar hóskvøldið, skrivar danska TV2.

Esvagt sleipar nú skipið til Bremerhafen. Við umborð eru 397 fólk - 266 ferðafólk og so manningin, sum er 131 fólk. Øll fólkini umborð hava tað gott.

Cruise-fyritøkan HX, sum hoyrir undir Hurtigruten samtakið, eigur skipið, sum er bygt í 2003.