Øll sum hava søkt hava fingið

60 fólk hava søkt um framskundaða pensjón, síðani tann møguleikin kom í 2019.

Allar umsóknir eru játtaðar.

Viðgerðartíðin er í miðal 141 dagar. 

Er tíðin drigin frá, har Almannaverkið bíðar eftir serlæknaváttanum, er miðal viðgerðartíðin 88 dagar. 

Tað sigur Sirið Stenberg, landsstýriskvinna, í svari til Súsonnu Bertholdsen, løgtingskvinnu, sum spurdi um framskundaða pensjón.

Tey flestu, sum søkja um framskundaða pensjón, hava samband við Almannaverkið, áðrenn umsóknin verður send. 

Arbeiða hálva tíð

Treytin fyri at søkja um framskundaða pensón er, at arbeiðsførleikin varandi er minkaður niður í helvt. 

Tað er, at fólk ikki megna at arbeiða meira enn hálva tíð. 

Fólk kunnu søkja um framskundaða pensjón trý ár fyri pensjónsaldurin, sum enn er 67 ár.

Á heimasíðuni hjá Almannaverkinum stendur, at fólk, sum eru fylt 64 ár, skulu heldur søkja um framskundaða pensjón enn fyritíðarpensjón, tí viðgerðin er skjótari, og veitingin er galdandi frá 1. í mánaðinum eftir, at Almannaverkið hevur fingið umsóknina.