Nú ber til at koma við ráðum um Stenomiðstøðina

Ráðgeving og prosjektering í sambandi við Stenomiðstøðina, sum skal byggjast í Havn, eru boðin út.

Byggjast skal uppi yvir verandi C-bygningi á Landssjúkrahúsinum.

Og miðstøðin skal knýtast saman við B-bygninginum. 

Bygningurin verður 1.200 fermetrar, sum skulu býtast millum tvær hæddir.

Avtalan kom í fjør

Avtalan um Steno miðstøðina var undirskrivað 26.september í fjør.

Landsstýrismaðurin í heilsumálum, sum var tá, Kaj Leo Holm Johannesen, bað løgtingið um loyvi at taka móti 121 milliónum krónum frá Novo Nordisk grunninum. Tað fekk hann.

Peningurin skal brúkast árini 2023 til og við 2032 til at fíggja rakstur og íløgur í samstarvinum um millum annað diabetis millum Novo Nordisk grunnin og Heilsumálaráðið.

Freistin at bjóða er til 6.februar, tá tilboðini eisini vera latin upp.