Hóttir Taivan

Tað slepst ikki undan, at Kina og Taivan aftur verða sameind.

Tað staðfesti kinesiski forsetin, Xi Jinping, í sínari nýggjársrøðu í gjárkvøldið. 

Tað skrivar tíðindasíðan Politico.eu.

Forseta- og tjóðartingsval
Hóttanin frá kinesiska forsetanum fellir minni enn tvær vikur áðrenn forseta- og tjóðartingsvalini í Taivani.

Hóast Taivan loysti frá Kina í borgarakrígnum í 1949, hevur Kina hvørki viðurkent Taivan sum sjálvstøðugt land ella útihýst møguleikanum fyri at hertaka landið við hermegi.

Og seinastu árini hava kinesiskir myndugleikar í størri mun hert retorikkin móti Taivan og USA, sum hevur bundið seg til at hjálpa at verja Taivan.

Val verður í Taivan 13 januar. Sambært veljarakanningunum er lítil munur í undirtøkuni hjá Lai Ching-te úr stjórnarflokkinum Demokratiski flokkurin, og Hou Yu-ik úr andstøðuflokkinum Kuomintang.

Bæði valevnir hava í valstríðnum lagt dent á, at tey ynskja friðarlig viðurskifti við Kina.