Nato vil framleiða meiri lóður

Tá ið verjumálaráðharrarnir í Nato hittast á fundi í hesi vikuni, skulu teir m.a. kjakast um, at ferð skal setast á at framleiða lóður. 

Tað sigur Jens Stoltenberg, aðalskrivari í Nato.

Seinasta mánaðin hevur Nato gjørt avtalur um størri framleiðslu av lóðuri 10 milliardir dollarar.

- Hesa vikuna kunngjørdi Týskland, at ein verksmiðja verður byrgd í landspartinum Niedersachsen. Og tá full ferð er komin framleiðsluna, kann hon framleiða 200.000 spreingiknøttar, segði aðalskrivarin í Nato á tíðindafundi fyrrapartin.

Útreiðslur til verju

Spurdur, hvørji lond lúka málið um at brúka í minsta lagi tvey prosent av bruttotjóðarúrtøkuni til verju, svaraði hann:

- 18 lond halda málið um tvey prosent, og tað eru seks ferðir so nógv, sum tá málið um tvey prosent var samtykt, segði Stoltenberg á tíðindafundinum.

Týskland hevur fyri fyrstu ferð síðani 1992 rokkið málinum hjá Nato um at brúka í minsta lagi tvey prosent av BTÚ til verju, skrivar DPA-tíðindastovan, sambært Reuters.

Russiska innrásin hevur ávirkað

Týskland, sum hevur størsta búskap í Evropa, hevur av álvara sett ferð á verjuøkið eftir russisku innrásina fyri tveimum árum síðani.

Týska stjórnin ætlar at brúka góðar 73,4 milliardir dollarar til verju í ár. Tað eru 2,01 prosent av BTÚ.

Og samstundis sum Stoltenberg helt tíðindafundin, boðaði danski verjumálaráðharrin, Troels Lund Poulsen, frá, at Danmark fyri fyrstu ferð hevur brúkt í minsta lagi tvey prosent av BTÚ til verjuna.