Heimablídni í Grønlandi

Í Føroyum hava vit í nøkur ár havt Heimablídni, har ferðafólk kunnu koma inn til vanligar føroyingar at eta og annars uppliva føroyskan mat og mentan frá fremstu røð.

Nú ætlar grønlendska Sermersooq kommuna at royna tað sama í Eysturgrønlandi, og tað skal gerast við Heimablídni sum fyrimynd.

Tað skrivar blaðið Sermitsiaq í dag.

Grønlendska matvørulógin forðar annars fyri, at tað ber til at hava Heimablídni í Grønlandi, men gjøgnum eina fyriskipan, sum eitur frikommuneforsøg, vónar kommunan at fáa undantøk, so ein skipan við Heimablídni kann roynast í eina tíð.

Millum hesi undantøkini er, at privatfólk kunnu selja matvørur í egnum privata heimi uttan fyrst at skula skráseta seg og fáa góðkenning frá myndugleikunum. 

Ætlanin er at royna Heimablídni í Grønlandi fram til ársenda í 2026, skrivar Sermitsiaq.