400 týsk løgreglufólk undir illgruna fyri víðgongd sjónarmið

Fleiri enn 400 løgreglufólk í Týsklandi verða kannað, tí illgruni er um, at tey hava høgravíðgongd sjónarmið, ella stuðla konspiratiónsteorium.

Illgrunin kom eftir eina kanning, sum innanríkisráðið gjørdi í teimum 16 landspørtunum í Týsklandi, skrivar týska blaðið STern, sum hevur almannakunngjørt frágreiðingina.

- Fólk, sum ikki taka undir við grundlógini, men fylgja víðgongdum sjónarmiðum, eru stórur vandi fyri demokratiið og rættarsamfelagið, sigur Herbert Reul, ráðharri í landspartinum Nordrhein-Westfalen. 

Løgreglan og trygdarmyndugleikar eru kannað í fleiri ár, og innanríkisráðið almannakunngjørdi eina frágreiðing um hetta í 2022.

Tá vóru 327 fólk, sum starvast við trygd, í trý ár avdúkað fyri at hava havt samband við høgravíðgongd umhvørvi.