Halla Tómasdóttir forseti í Íslandi

Hóast nøkur fá valstøð ikki eru komin inn enn, hevur Halla Tómasdóttir fingið 34,6 prosent av atkvøðununum, meðan fyrrverandi forsætisráðharrin, Katrin Jakobsdóttir, higartil hevur fingið 25 prosent av atkvøðunum.

Tað er væl størri munur á, enn fleiri av veljarakanningunum høvdu givið ábendingar um undan valinum. Í nøkrum teirra stóð at kalla á jøvnum millum Hallu Tómasdóttir og Katrina Jakobsdóttir.

Katrin Jakobsdóttir legði herfyri frá sær sum forsætisráðharri fyri at vera forsetavalevni, men tíðliga í nátt viðurkendi hon val-ósigurin og ynskti Hallu Tómasdóttir tillukku við sigrinum, og segði við almenna íslendska miðilin, RUV, at hon ikki fór at stilla upp aftur sum forseti Íslands eina aðru ferð.