Steve Bannon skal í fongsul fyri at vanvirða kongressina

Steve Bannon, sum leingi hevur verið ein av tættastu sameindu hjá Donaldi Trump, fekk í gjár ikki viðhald í umsókn síni um at bíða við dóminum, sum hann hevur fingið fyri at vanvirða kongressina.

Ein kærunevnd vísti umsóknini hjá Bannon aftur, og hann skal sostatt inn at sita dómin 1. juli. 

Hann var dømdur fýra mánaða fongsul fyri at vanvirða Kongressina, tá ið hann sýtti fyri at møta til hoyring, í sambandi við álopið á kongressina í januar 2021.

Sakførarar hansara heittu á kærunevndina um at lata Bannon ganga leysan, meðan roynt verður at fáa dómin broyttan. 

Um neyðugt, ætlar Bannon at skjóta dómin inn fyri Hægstarætt.

Dómurin fevnir eisini um, at Bannon sýtti fyri at leggja fram skjøl í sambandi við, at hann var uppi í royndini hjá Trump at broyta valúrslitið, eftir at Joe Biden vann forsetavalið í november 2020.