Amerikanski og russiski verjumálaráðharrin tosaðu í telefon

Fyri fyrstu ferð í meira enn eitt ár er diplomatiska sambandið millum amerikonsku og russisku verjumálaráðini tikið uppaftur.

Í gjár prátaðu amerikanski verjumálaráðharrin, Lloyd Austin, og russiski starvsbróðurin, Andrej Belousov, í telefon.

Amerikanska verjumálaráðið sigur í tíðindaskrivi, at Austin legði dent á týdningin av at halda sambandið við Russland, hóast russisku innrásina í Ukraina.

USA tók stig til telefonsamrøðuna, eftir at Russland fyrr í vikuni hótti USA við "avleiðingum", tá Ukraina leyp á Krim-hálvoynna, sum Russland hertók í 2014.

Sambandið millum Russland og USA er vorðið spent, eftir at USA hevur givið Ukraina loyvi at brúka amerikonsk vápn at leypa á mál í russiskum øki.