Sterkar nudlur fríkendar

- Eg tori ikki at siga við vissu hvat vit gera, men vit plaga at fylgja donsku tilmælunum, sigur Bárður Enni, stjótri á Heilsufrøðiligu Starvsstovuni.

Fyri nøkrum vikum síðan setti danska Fødevarestyrelsen bann fyri at selja nudlur av slagnum Samyang Buldak 3 x Spicy Hot Chicken, Samyang Buldak 2 x Spicy Hot Chicken og Samyang Buldak Hot Chicken Stew.

Og Heilsufrøðiliga Starvsstovan helt, at føroyingar vóru líka veikir móti sterka smakkinum og setti somuleiðis bann at selja hesi sløg av nudlum í Føroyum.

At bannið varð sett fekk nógvar útlendskar miðlar at skriva um eymu gómarnar hjá dønum og gjørdu gjøldur burturúr.

Men nú hava danskir myndugleikar funnið út av, at innihaldið av capsaicin ikki er so høgt, at tað er vandamikið. Tað er capsaicin sum gevur tann sterka brennandi chilismakkin.

Donsku myndugleikarnir halda tó enn, at Samyang Buldak 3 x Spicy Hot Chicken er í sterkara lagi fyri danskar gómar og tí stendur tað bannið við - hinir bæði sløgini kunnu nú aftur koma á donsku søluhillarnar.